Niyə Könüllü Olmalı?
Şəxsi İnkişaf
Könüllülük sizə yeni bacarıqlar qazanmaq və özünüzü kəşf etmək imkanı verir.
Geniş Şəbəkə
İntellektual gənclər mühitinə daxil olaraq dəyərli əlaqələr və dostluqlar qazanın.
Sosial
Təsir
Cəmiyyətə fayda verməklə real dəyişikliyin bir hissəsi olun və təcrübə toplayın.
Qeydiyyat və Qoşulma
1. Müraciət
Onlayn formanı dolduraraq öz fəaliyyət sahəniz üzrə bizə müraciət edin.
2. Müsahibə
Müraciətiniz dəyərləndirildikdən sonra seçilmiş namizədlər müsahibəyə dəvət olunacaq.
3. Komandaya Qoşulma
Uğurlu namizədlər təlimlərdən keçərək intellektual hərəkatın rəsmi üzvü olurlar.
Azərbaycanda könüllülük hərəkatının inkişafı
Azərbaycanın yenidən müstəqillik əldə etməsindən sonra ölkədə vətəndaş fəallığının və ictimai təşəbbüslərin inkişafında könüllülük mühüm istiqamətlərdən birinə çevrilmişdir. Könüllülük insanların öz istəyi ilə, maddi qarşılıq gözləmədən cəmiyyətə fayda verməsinə və sosial məsuliyyət hissinin formalaşmasına xidmət edən fəaliyyət sahəsidir.
Müasir Azərbaycanda könüllülüyün inkişafı xüsusilə Ulu Öndər Heydər Əliyevin hakimiyyətə qayıdışından sonra həyata keçirilən gənclər siyasəti və dövlət-cəmiyyət əməkdaşlığının gücləndirilməsi ilə yeni mərhələyə qədəm qoymuşdur. Ulu Öndər Heydər Əliyev gənclərin ölkənin ictimai həyatında fəal iştirakına, onların təhsilinə, inkişafına və gələcək dövlət quruculuğunda roluna xüsusi əhəmiyyət vermişdir. Bu siyasətin nəticəsi olaraq gənclərin müxtəlif ictimai təşəbbüslərdə iştirak etməsi üçün yeni imkanlar yaranmışdır.
Könüllülük fəaliyyətinin daha sistemli şəkildə inkişaf etdirilməsi istiqamətində 1998-ci ildə Gənclər, İdman və Turizm Nazirliyi, BMT-nin İnkişaf Proqramı və BMT Könüllüləri Proqramının birgə layihəsinin fəaliyyətə başlaması mühüm addımlardan biri olmuşdur. Daha sonra, 2009-cu ildə “Könüllü fəaliyyət haqqında” Qanunun qəbul edilməsi könüllülüyün hüquqi əsaslarını müəyyənləşdirərək bu sahənin inkişafına əlavə imkanlar yaratmışdır.
Bu prosesin davamı olaraq 2013-cü ildə ASAN Könüllüləri Təşkilatının yaradılması minlərlə gəncin könüllülük fəaliyyətinə cəlb olunmasına və müxtəlif sahələrdə praktiki təcrübə qazanmasına şərait yaratmışdır. “Eurovision-2012”, 2015-ci il Avropa Oyunları, 2017-ci il İslam Həmrəyliyi Oyunları və “Formula 1” kimi beynəlxalq tədbirlərdə minlərlə könüllünün iştirakı Azərbaycanda geniş və təcrübəli könüllü bazasının formalaşmasına kömək etmişdir.
Sonrakı illərdə könüllülük sosial, humanitar, ekoloji, təhsil və digər sahələrə də yayılaraq gənclərin liderlik, komanda işi, ünsiyyət və təşkilatçılıq bacarıqlarının inkişafında mühüm rol oynamışdır. Nəticə etibarilə, Ulu Öndər Heydər Əliyevin formalaşdırdığı gənclər siyasəti və sonrakı dövrdə həyata keçirilən tədbirlər Azərbaycanda könüllülük hərəkatının inkişafı üçün mühüm zəmin yaratmış, könüllülük isə bu gün gənclərin ictimai fəallığının əsas istiqamətlərindən birinə çevrilmişdir
